Hoi ye 8 de marzu, Día Internacional de la Muyer Trabayadora, una xornada pa la reivindicación de la igualdá y el fin de la discriminación y la invisibilización de les muyeres en tol mundu.
Nesti día prestábame presentavos a cinco moces gaiteres que nun podéis dexar de conocer.
María López Carballo
María ye una gaitera de Neda (A Coruña) que lleva tocando la gaita dende bien neña. Ye una gaitera de una sensibilidá espectacular, que tamién toca perbien la zanfona y el pianu. Amás, puedo dicir arguyosu que tuvi la oportunidá de guiala nel aprendizaxe de la gaita asturiana, instrumentu que tamién toca fenomenal.
A día d’hoi, María ye la participante más moza n’algamar el Trophée Maccrimmon de gaita nel Festival Interceltique de Lorient, premiu que consiguió en 2019 a los 14 años d’edá.
Tái atentxs a esta moza porque de xuru que va a dar muncho que falar nos años próximos.
Enora Morice
Enora Morice ye una de les gaiteres bretones moces más destacaes. Entamó a la edá de seis años a tocar el vigulín pa siguir cola gaita a los diez. Estudió nel Conservatoriu de Brest y completó la so formación con un Máster en Música Tradicional nel Real Conservatoriu d’Escocia.
Amás de participar en dellos bagadoù y pipe band a lo llargo déstos años, Enora integra’l dúu NAORA cola harpista sueca Justyna Krzyzanowska y forma pareya tradicional de gaita y bombarda con so pa, Philippe Morice y tamién con Maelann Hervée. Amás, lidera’l triu Enora Morice Trio, xunta los clarinetistes Hugo Clédat y Constant Le Barh.
Andrea Joglar
Andrea ye una de les gaiteres asturianes más destacaes de la so xeneración. Dende neña ganó bien de concursos de gaita solista siendo la primera muyer en ganar premios tan prestixosos como’l Concursu y Muestra de Folclor «Ciudá d’Uviéu» o’l Trophée Maccrimmon del Festival de Lorient (2010). Tien collaborao o grabao con grupos y artistes de la talla de Carlos Núñez, Bagad de Lann- Bihoué, Llan de Cubel, Felpeyu o la Orquesta Sinfónica de Bretaña entre otra montonera d’ellos. Anguaño toca colos grupos Cerezal y Last days of Eden amás de codirixir LaKadarma.
Nadia Vázquez
Nadia Vázquez ye una gaitera de A Guarda (Pontevedra). Entamó la so formación nel Conservatoriu Profesional de Tui, onde foi premiu Fin de Grau y continuó los sos estudios nel Conservatoriu Superior de Vigo. Demientres estudió’l Superior, cursó l’erasmus na universidá LUCA School of arts, onde s’introduz na musette barroca de manos del reputáu maestru internacional Jean Pierre Van Hees. Amás d’ello impartió conferencies sobre la gaita per dellos países d’Europa como Bélxica y Eslovaquia.
Nadia ye la primera muyer n’algamar el Concursu Solista de Cornamusas de Francia, en 2018.
Brìghde Chaimbeul
Dende la islla de Skye, Brìghde Chaimbeul rescampla como una de les moces promesa de la gaita n’Escocia. Ganadora de premios como’l BBC Radio 2 Horizon Award en 2019 o’l BBC Radio 2 Young Folk Award en 2016, Brìghde centra la so carrera musical na smallpipe escocesa, desendolcando un estilu personal con influencies tan estremaes como la música tradicional del este d’Europa, Irlanda o Cape Breton.
El so discu debut «The Reeling» presentóse en 2019 nel Festival Celtic Connections de Glasgow, y foi aclamáu como’l «discu folk del mes» pol diariu The Guardian y como ún de les meyores 20 discos de folk del añu nos Say Awards.
Esti discu ta producíu por Aidan O’Rourke, vigulineru del grupu Lau y ún de los músicos más importantes d’anguaño n’Escocia.
Toes elles tienen muncho que dicir nel mundu de la música de gaita y ensin llugar a duldes, van trazar el camín pa munches de les nueves xeneraciones de gaiteres y gaiteros que tan por venir.
