Bones a toos, vuelvo a tar inspiráu pa sentame a escribir un trechu y contavos un poquiñín sobre’l trabayu que desendolco anguaño: la enseñanza de música tradicional asturiana.
Entamaré falando de la mio experiencia docente y los diferentes llugares nos que fice llabor enantes d’embarcame nel proyectu “Enseñanza de música tradicional asturiana”.
La verdá ye que ya fai bastante tiempu qu’entamó’l mio interés pola docencia. Dende siempre me llamó l’atención el fechu de les diferentes maneres que tenemos les persones d’aprender. Ello, xuníu al fechu de ser fiyu y sobrín de mayestres fexo qu’al acabar el bachilleratu entamará a estudiar la llicenciatura de Pedagoxía na Universidá d’Uviéu. Ye cierto que mentiría si vos dixera qu’esa decisión foi por razones vocacionales nesi momentu. Al par d’ello entré a estudiar el Grau Profesional de Gaita nel Conservatoriu Profesional de Música d’Uviéu, formando parte de la primer promoción de músicos con esi títulu n’Asturies. Amás profundicé nos procesos d’enseñanza-deprendimientu y delles estayes educatives nel Máster d’Intervención y Investigación Socioeducativa.
Nestos años entamé a dar palos de ciegu no qu’a la enseñanza de la gaita asturiana se refier, dando delles clases particulares en casa. Foi un choque cola realidá el tener qu’amosar cómo facer sonar una gaita a persones que nunca antes vieron nada paecío. Darréu d’ello impartí tamién clases particulares de gaita a dellos miembros de la Banda de Gaites Ribeseya, nel períodu nel que fui componente d’esta agrupación.
Desempeñu profesional
Ente los años 2012 y 2015 formé parte del claustru de profesores de la Escuela Municipal de Música de Nava. Nesti centru tuve la oportunidá d’encargame del Aula de Gaita Asturiana y cordinar la Bandina de Gaites de la escuela. Amás d’ello, desendolqué’l llabor de cordinador de les tres ediciones de les Xornaes de Música Tradicional de Nava y formé parte de la organización del Premiu de Percusión Tradicional “Manegueru de Nava”.
Dende esti cursu 2016/2017 doi el pasu como trabayaor por cuenta propia col proyectu “Rodrigo Joglar. Enseñanza de Música Tradicional Asturiana”.
Nesta nueva etapa profesional con centru neurálxicu en Cabranes compaxino clases particulares de llinguaxe musical, gaita asturiana, percusión tradicional y curdión diatónicu de manera presencial y online. Asina mesmo tamién trabayo n’otres entidaes o asociaciones qu’amuesen interés pola mio docencia.
Les mios clases siguen una metodoloxía adautada a les necesidaes particulares de cada alumnx. Pa ello emplego bayura de materiales (llibros, discos, aplicaciones, programes informáticos, etc.), tratando d’ufrir una formación personalizada d’alcuerdu coles necesidaes y intereses de cada persona.
El proyectu “Enseñanza de Música Tradicional Asturiana” ta acabante de superar la escoyeta pa recibir financiación europea LEADER. Esta llinia d’ayuda ta xestionada pola Conseyería de Desarrollu Rural y Recursos Ñaturales del Principáu d’Asturies al traviés del Grupu d’Acción Llocal ADRI – Comarca de la Sidra.
Anguaño toi faciendo llabor, amás d’a nivel particular, nes escueles de LaKadarma, EMTO, TradiGaita y la Escuela de Música y Danza Popular de Noreña.
¿Prestaríate facer una clase de prueba? ¡Coméntamelo equí!
