Primer cursu de gaita asturiana
Equí te traigo les primeres 24 melodíes que componen el primer cursu d’Alborada. Métodu de gaita asturiana, de Flavio R. Benito.
Nel videu podrás siguir la partitura demientres sientes y ves la interpretación de la melodía, siempres cola referencia d’un metrónomu. ¡Espero que te seya d’ayuda!
Prestaríame aprovechar estes llinies pa agradecer fonderamente a Flavio’l so trabayu descomanáu de trescripción, secuenciación y adaptación de melodíes nesta publicación, así como’l so total apoyu y disposición a la grabación d’estos materiales complementarios a la so obra. ¡Munchísimes gracies!
1.1. La casa del señor cura
Nesta melodía trabayaremos les repeticiones de notes de la mano inferior con figuraciones de negra y corchea.
Na tarxeta qu’apaez al final del videu enllázovos a un amiestu de temes del grupu folk llaniscu Niundes, qu’aparez nel so discu Enxamás ye pa siempres: La casa’l señor cura/El mandilín/Danza d’arcos/Qué h.oy/Vémonos en Tercies.
1.2. El ramiquín
Nesta melodía introducimos la nota La amás d’un intervalu de cuarta (Si-Mi) na mano inferior.
1.3. El pericote
Anque la versión que vamos deprender nós equí ye una más sencillina qu’apaez recoyía nel Cancionero de la Lírica Popular Asturiana de Eduardo Martínez Torner, na tarxeta qu’enllazo al final del videu vamos deprender un poquiñín más sobre esti baille, ensín llugar a duldes el más emblemáticu del conceyu de Llanes.
1.5. L'ablanera
Nesta partitura entamaremos a emplegar trinos nes notes Sol y Re.
Na tarxeta del final del videu tenemos un amiestu del primer discu del grupu folk Felpeyu, compuestu por un arreglu de tres melodies: La escosa, Os cachetíos y L’ablanera.
Os cachetíos vamos deprendela na llección 1.19. d’esti cursu.
1.6. ¡Quién quier entrar!
Nesta partitura entamaremos a emplegar vibratos nes notes Fa y Do.
Nel videu de la tarxeta final tráigovos una actuación en directu del grupu Felpeyu nel programa Studio 22 na Televisión d’Australia, durante una xira del grupu pel país en 2001.
El cantar ye Tierra, qu’inclúi una versión de curdión del tema ¡Quién quier entrar!. Esti tema pertenez al segundu discu del grupu, llamáu tamién Tierra. La melodía que cierra l’amiestu ye’l Entemediu de Chema Castañón, melodía qu’aprenderemos más alantre.
1.7. Chalaneru
El chalaneru ye ún de los cantares más emblemáticos d’Asturies, especialmente na parte de Llaviana.
Na tarxeta del final vemos una collaboración d’un grupu folk y una banda de gaites. Trátase de Felpeyu y LaKadarma, tocando xuntos la versión de Felpeyu del Chalaneru, en directu nel conciertu XXV Aniversariu del grupu na Plaza mayor de Xixón.
1.8. El mandilín
El mandilín ye otru clásicu del repertoriu tradicional, perespardíu per toa Asturies pero tamién n’otros llugares de la península.
Como exemplu, na tarxeta final vos dexo otra versión d’El Mandilín, nesta ocasión, a cargu del grupu folk castellanu Carrión Folk nel so discu Tradiciones vivas.
1.9. Cuando te vi na fonte
Con esta cenciella melodía entamamos a trabayar el compás ternariu de 3/4.
1.10. La virxen de Covadonga
Otra melodía pa familiarizanos col compás de 3/4, estrayía del llibru-discu Blimes de Nacho Fonseca.
1.11. N'Uviéu nun me caso
Otru de los temas clásicos del repertoriu. Nesta ocasión tenemos na tarxeta final l’enllaz a una xuntaza de dos cantares, N’Uviéu nun me caso y Nun tabes allí, cantaos con acompañamientu de rabel, instrumentu de cuerda frotada que n’Asturies recibe’l nome de bandurria, pol rabelista llionés José Francisco Fernández Juárez.
Nun tabes allí vamos deprendela na llección 1.22. d’esti cursu.
1.12. Cada vez que voi a Llanes
Otra melodía cenciella en compás de 3/4. Nesta ocasión introducimos-y un trinu a la negra con puntín y tamién delles síncopes.
1.13. En Santo Domingo entré
Otra melodía perconocía del repertoriu cantáu asturianu.
Na tarxeta del final vos dexo Carretera ye un cantar qu’apaez en Cerquina, el sextu discu de Felpeyu. La melodía de base ye En Santo Domingo entré y la lletra fala de les vivencies d’un grupu de música especialmente durante les xires y viaxes: kilómetros, tiempos d’espera, convivencia…
1.14. La muyer de Pachín
Otra melodía bien cenciella cola que trabayaremos repeticiones, negres con puntín y trinos.
1.15. Polka de Veneros
Nesta melodía con ritmu de polka trabayaremos delles síncopes.
Na tarxeta final déxovos una versión con un ritmu bien particular de la polka de Veneros (dalguna xente escríbelo con B) que grabó el grupu folk uvieín Gatos del Fornu nel so primer discu. ¿Sabes en qué compás ta?
1.16. Una vez dixiste que sí
Salíi moces a baillar ye otru de los nomes pol que se conoz a esti cantar. Déxovos de nuevu la versión del grupu Felpeyu, precedía por una versión de vigulín y curdión de la muñeira de Bargaz. Podéis atopar esti tema nel discu Tierra, segundu trabayu de Felpeyu.
1.17. Aguilandu en La Foz
Un aguilandu ye una comitiva de moces y mozos (antiguamente solía tar formada por rapazos namás, al tar mal visto polo xeneral que les rapaces participaren nestes manifestaciones) que percorríen les cases de los pueblos y villes asturianos cantando coples y pidiendo unos “cuartos”, tantu comida y bebida como perres.
Esta versión ta recoyía por l’Andecha Folclor d’Uviéu en La Foz (co. Morcín).
1.18. Casóse Maruxa
Otra melodía pa la reciella iguada por Nacho Fonseca.
Esta vuelta enllazamos con un videu d’una de les mios escolines de gaita, Samira Fernández, tocando nun conciertu de fin de cursu en Noreña.
1.19. Os cachetíos
Os cachetíos ye un baille-xuegu mui prestosu. Al final vos dexo un videu de Dani Álvarez y Fani Moro tocándolu nun amagüestu nun colexu.
1.20. Ríu verde
Esta melodía ye un valsiáu perconocíu per tol noroeste peninsular.
Darréu vos enllazo con un amiestu a ritmu de muñeira del CD Esnalar, segundu discu del grupu folk Llangres.
1.21. Ringo-Rango
Otra melodía clásica del nuestru repertoriu. Darréu vos dexo otra perguapa versión del cantar Ringorrango qu’atopamos nel quintu discu de Felpeyu, entituláu Canteros.
Como curiosidá, esti ye l’únicu discu del grupu nel que empleguen gaita afinada en La, en llugar de la qu’usen nel restu de discos, que ta afinada en Si bemol.
1.22. Nun tabes allí
Otra melodía perconocía en compás 3/4. Estos cantarinos ternarios son emplegaos davezu como mudances pal baille na jota asturiana.
1.23. Dancitas
Las dancitas son un baille vaqueiru mui cañeru, báillase en corru por pareyes, cada vez a más velocidá.
Caldo y Os Rabizos ye un grupu de música tradicional que tocar repertoriu del occidente asturianu, concretamente de les tierres situaes entre los ríos Eo y Navia. ¿Sedrás capaz a conseguir tocalo a la mesma velocidá que ellos?
1.24. ¡Ay, Pinín!
Esti cantar tamién conocíu como ¡Ay, Pachín! o D’equí a Somió, cuenta la hestoria d’una moza emponderándose pa qu’un mozu la cortexe.
Esta melodía tien una igua perguapa nel primer discu del míticu grupu asturianu Llan de Cubel, que podéis sentir nel enllaz que vos dexo al final del videu.
¿Ties dalguna dulda o entruga sobre esti Primer cursu de gaita asturiana? Nun dexes de ponete en contautu conmigo y fadré por ayudate.