Llámome Rodri Joglar y soi gaiteru. Esti entamu puede sonar a presentación nuna sesión d’alcohólicos anónimos, pero ye la forma más cenciella que se m’ocurre p’arrancar con esti blogue. La verdá ye que fai tiempu que llevo dando-y vueltes al tema de compartir delles idees y inquietudes per esti mediu y nun se si ye la entrada súbita del otoñu de la selmana pasada, que tamos acercándonos a la berrea o qué se yo, pero el casu ye que equí tamos, como quien s’apunta al ximnasiu a la vuelta setiembre. Esti símil nun ye casual tampocu porque, igual qu’el ximnasiu, ésto pue durar una entrada, una selmana o diez años, anque esperemos que seya más lo último que lo primero. El casu ye que voi dedicar esta primer entrada pa falar de los mios entamos como gaiteru.
Pa los que nun me conozáis, sí, soi gaiteru y nun m’avergoña reconocelo. El casu ye qu’entamé medio por casualidá con esti tema de la gaita con diez años, un día que nun mercáu astur na plaza mayor de Xixón a mios pas dió-yos por entrugar a un paisanu que taba ellí con un tornu faciendo gaites qu’ónde podíen mandar a los guajes p’apuntalos a gaita, que-yos apetecía (a ellos, non a los guajes). Aquel paisanu díxo-yos qu’él ponía clas de gaita en Llugones y n’Uviéu pero que tenía un collaciu per Xixón que taba bien pa probar un pocu a ver si l’asuntu tenía recorríu o los guajes pasaben del tema.
Asina foi qu’empobinaos por aquel artesanu que nun yera otru que Vicente Prado “El Pravianu” allá fuimos los llunes la mio hermana Andrea y yo pal Atenéu de La Calzada a clases de gaita.
LÁtenéu de La Calzada
Yera l’añu 98, taba en ciernes el boom que supondría a nivel mundial el primer discu d’Hevia, “Tierra de Nadie” y como nosotros, cientos de rapacinos y rapacines per toa Asturies apaecieren per milenta escueles de toa triba pa deprender a tocar la gaita.
El primer día marché d’allá llorando. Que de qué diba yo tocar la gaita, que lo llevaben claro, que vaya mierda yera aquello, que yo pasaba del tema. Sí, vas apañáu. Agora dixisti que t’apuntabes y aguantes hasta xunu. Sí, ho. No, ye broma.
Y asina foi. Un llunes tres otru, ellí baxábemos pal auditoriu del Atenéu, cola flautuca Hohner de plásticu trucada pa dixitación de gaita, yo con diez tacos y la mio hermana con siete.
El métodu yera cenciellu, teníemos una cuartiella con una llistuca de cancionuques, ordenaes de más fáciles a más difíciles y los mayestros, Juan Carlos Varela y Jorge González, diben rotando per tolos alumnos qu’andabemos pel patiu butaques, l’escenariu y entre bambalines, con flautes y gaites dando-y al tema.
La canción sacábesla d’oreya, y amás nosotros como yeramos los más pequeños con un cachu, tábemos bien cuidaos polos mayestros. Taben un trechu contigo, explicabente un pocu les notes y poníemosnos mano a mano a intentar quedanos cola copla enantes que se nos escaeciera. Según como se diera la cosa, pasaben un par de veces o tres a mirar un pocu lo que facíemos, pero’l restu del tiempu ellí tabes, cara pa la flauta, exprimiendo la corteya prefrontal rostromedial.
Y diréis vosotros, pos vaya guapo. Ensin partitures, nin dos por cuatro, ni do, re mi. Y diréis, ¿pa ónde vas asina, artista? Voi decivos yo pa ónde. Lo fácil ye pensar lo que taréis pensando (o non, yo qué se), que la música hai qu’aprendela con partitura, que depués si quies facer dalgo más en seriu ties que tener estudios musicales y too eso. Ya, ya lo sé. Tenéis tola razón del mundu. Agora voi decivos lo qu’aprendí yo nesi llugar, qu’agora, dellos años dempués paezme dalgo de muncho valir y que seguramente afitó la base d’otres munches coses que pasaríen depués.
Pa entamar, el respetu absolutu que se tien por daquién cuando sabes que ta esforzándose al máximu por enseñate too, lo muncho o lo poco, que sabe.
Pa siguir, el fechu de tar rodeáu de xente tocando, de diferentes niveles, estimúlate pa dicir “meca, ¿qué sera esa canción que ta tocando aquella?” o “mira lo que fai esti col deu nosecual” y sobre too, cuando yes un guaje tan pequeñu y ties per delantre hora y picu de flauta y experimentos, date pie a explorar perriba y per baxu les posibilidaes que tienes.
Amás, al pocu d’entamar, como a la tercera selmana que pasóseme la gilipollez yá, (digo pasóseme, porque Andrea diba encantada de la vida) entamó a ser un retu el dir tachando cancionuques d’aquella llista y pocu a pocu la flauta foi convirtiéndose nun xuguete más, nel que se volcaben canciones que sentíemos sobre too nel cassette del coche, que d’aquella yera ún de los momentos musicales del día. Viaxes de Xixón a Cabranes, pela vieya, cola banda sonora de la cassette de Hevia, otra de Felpeyu, de Vicente Díaz, de Victor Manuel y otra de Belén Arboleya y Consuelo González, amás d’una cinta grabada d’un discu de Carlos Núñez y rellenada con otru de Billy Joe Royal.
Nun teníemos l’accesu a la música tan agorafóbicu qu’hai anguaño y eso notábase. Notábase en que reiterabes, escuchabes una mesma cassette o un mesmu discu cientos de veces y, quieras que non, facíes oreya. Alcuérdome que cuando les cintes entamaben a fastidiase, sabíemosnos hasta’l momentu en que la canción diba distorsionar y, si la cinta yera grabada, el segundu exactu de la canción nel que diba saltar el cassette.
D’aquella diba tamién pel Atenéu Santiago González, un paisanu de lo meyor, inquietu, investigaor, lo que n’Asturies llamamos un “curiosu”. Santi dixo que de qué, qu’había que facenos una gaituca pa dir arrancando y a los pocos meses apaeciónos con una fecha por él, qu’entá tenemos per casa.
Al añu siguiente mudámonos pa Posada de Llanera y Juan Carlos empobinónos pa la Escuela Municipal de Música, onde ponía clas Pedro Pangua, dábase solféu y les clases yeren más individualizaes, porque “sedría una pena qu’aquellos guajes nun se formaren más en seriu cola traza que ponen”. Esi añu simultaneamos dambes clases, un día díbemos a clase a La Calzada y otru a Posada, y dempués ya quedamos namás coles clases de la Escuela de Música, que tampocu yera plan tar tol día en danza per Asturies a cuentu la gaita (nun quedaba na…).
Esti mes d’ochobre ficieron 23 años de too ésto. La verdá ye que nun pueo tar más orguyosu d’unos entamos tan casuales como los que tuvi y colos que siempre taré en deuda. Vaya pa ellos tres, JuanCar, Jorge y Santi, dende estes llinies tol mio reconocimientu y un abrazu grande. Ensin llugar a duldes, ensin qu’estes persones hubieren empobinao los mios entamos como gaiteru la hestoria hoi sedría mui diferente.
Na siguiente entrada contarévos un pocu los mios entamos como docente. Tamién nel apartáu Sobre mi d’esta web vos dexo daqué más información sobre la mio trayectoria musical.
Per agora ye too, espero que la galbana nun s’apodere de mio ser en feches venideres y siga contándovos experiencies y cosuques relacionaes con esti tema que me llena, que ye la gaita asturiana.
