Hai muncha xente a la que-y llama l’atención la música tradicional, ya seya porque la sintió tola vida en casa al traviés de los cantares que so güela-y enseñaba, por ver actuar en dalguna romería a gaiteros, por tener dalgún collaciu nuna banda de gaites o nun grupu de baille o por milenta razones más que se nos puedan ocurrir.
Agora bien, a la hora de dar el pasu y decidise a deprender a tocar la gaita ye lóxico que nos asalten dudes:
¿Ónde pueo dir a deprender?
¿Qué formatu de clase ye’l más recomendable?
¿Qué necesito saber enantes d’entamar a clase?
¿Qué materiales se necesiten pa entamar?
Nesta entrada vamos tratar d’ufrir una primera orientación pa ayudar a responder a estes preguntes.
¿Ónde pueo dir a deprender a tocar la gaita?
- Profesores particulares
- Asociaciones culturales, como grupos folclóricos o bandes de gaites
- Escueles de Música Tradicional y academies privaes
- Escueles Municipales de Música dependientes de los conceyos
- Conservatorios de Grau Elemental y Profesional
- Si ties la posibilidá d’ello, escueye un llugar onde les clases se desarrollen nun llocal afayadizu pa esti fin: un aula equipada con materiales pa desendolcar les clases, llibros, discos, instrumentos, ensin qu’otres actividaes que puedan tar realizándose alredor interfieran na to clase. Les escueles de música municipales y la mayoría d’escueles privaes cuenten con aules d’estes característiques.
- Fuera d’Asturies munchos Centros Asturianos, Colectividaes y Cases d’Asturies ofrecen clases de gaita, percusión y baille asturianos.
- Si lo que busques ye algamar un títulu oficial de música, el llugar pa ello son los diferentes Conservatorios onde s’imparten les enseñances de gaita, el Conservatoriu Profesional de Música de Xixón y ‘l Conservatoriu Profesional de Música d’Uviéu.
- ¿Onde tú vives nun hai posibilidaes d’aprender a tocar la gaita de manera presencial? Agora puedes plantegate deprender mediante clases on-line, dende casa y de forma totalmente personalizada. Infórmate equí ensin compromisu negún.,
¿Qué formatu de clase ye'l más recomendable?
Anque, como ya falamos na primer entrada, les clases grupales puen ser un bon puntu de partida pa iniciase y facer un primer acercamientu al instrumentu, na nuestra opinión lo más recomendable ye que les clases seyan individuales, de manera que’l mayestru disponga d’una hora de clase pa tar contigo y pueda date una atención personalizada.
¿Qué necesito saber enantes d'entamar a clase de gaita?
N’Asturies existen munchos mayestros cualificaos tantu nel ámbitu pedagóxicu como nel musical pa impartir clases de gaita. Ya sabemos que como se suel dicir «l’hábitu nun fai al monxe», pero interésate por conocer la preparación y cualificación del mayestru col que vas a entamar a clase pa tratar de recibir una bona formación.
Si te ye posible, escueyi una escuela onde los mayestros seyan profesionales de la docencia, ello ye que tean daos d’alta como trabayadores nel so campu de trabayu. Les razones pa esto nun son otres que’l poner en valor la cultura tradicional na sociedá al fomentar la profesionalización de los docentes y sofitar opciones de trabayu dignes pal profesoráu de música tradicional.
Como en tantes otres facetes de la vida la opción más barata nun suel ser la más afayadiza. Nun escatimes en perres (dientro de les tos posibilidaes) a la hora de buscar clases de gaita de calidá, nun escaezas que munches veces… ¡lo barato sal caro!
Busca escueles y profesores que tengan un compromisu pa cola cultura asturiana. La gaita ye muncho más qu’un instrumentu musical, ye parte fundamental del llegáu cultural d’Asturies y poro, ye totalmente indisociable d’otres manifestaciones culturales del país como la llingua, l’arquitectura, o’l paisaxe, por citar dalguna. Parafraseando al collaciu Diego Pangua, mayestru gaiteru por abondos años en diferentes llugares d’Asturies, «normalmente, les escueles, bandes de gaites y/o profesores de música tradicional de calidá utilicen l’asturianu (o’l gallegu d’Asturies) na so cartelería y nes sos comunicaciones públiques nes redes sociales. Nun sé por qué ye, pero hai poques escepciones a esta regla: los profes de calidá son asturianistes, nun sentíu ampliu del términu. Ye una bona manera d’orientase. Y tien sentíu, porque la gaita ye un instrumentu con un pueblu detrás, col so contestu y la so tradición. Nun esiste nun vacíu cósmicu.»
¿Qué materiales se necesiten pa entamar?
Anque dependa del criteriu del to profesor y’l so estilu pa dar les clases, normalmente pa entamar necesitarás:
- Una flauta con dixitación de gaita. El to mayestru te dirá ónde pues conseguir una.
- Un métodu de gaita de los diferentes disponibles nel mercáu. El to profesor te recomendará’l métodu o métodos que más s’averen a la so propuesta curricular.
Amás d’ello, hai dellos materiales complementarios que te sedrán útiles nestos primeros pasos:
- Un metrónomu y un afinador. Si nun quies mercar unos (anque ye recomendable si quies tener material de calidá) existen delles aplicaciones gratuites pal to teléfonu móvil tantu d’afinador como de metrónomu bien cencielles d’usar.
- Una carpeta archivadora pa guardar fotocopies. Na mayoría d’escueles empléguense materiales complementarios creaos polos profesores (partitures d’exercicios, repertoriu complementariu…), asina que bien de xuru vas necesitar una carpetina pa organizalo too.
- Muncha música. Una de les claves p’avanzar nel deprendimientu d’un instrumentu musical ye empapase de tolo que tenga que ver con él y escuchar muncha música fecha pal to instrumentu: discos, videos, documentales, música en directu… too ello ayudaráte a «facer oreya», a ampliar repertoriu y a conocer meyor el to instrumentu.
